Туркия президенти Ражаб Тоййиб Эрдоған агар АҚШ Анқарага F-16 қирувчи самолётларини сотишни маъқулласа, Туркия Швециянинг Шимолий Атлантика альянсидаги аъзолигини ратификация қилишини айтди.
“Агар АҚШ ваъдаларини бажарса, парламентимиз ҳам ўз ваъдасини бажаради. Швециянинг НАТОга аъзо бўлиши бўйича якуний сўзни Туркия парламенти айтади”, — деди Эрдоған.
Туркия ташқи ишлар вазири Ҳоқон Фидан ва АҚШ Давлат котиби Энтони Блинкен ўтган ҳафта Нью-Йоркда Швециянинг НАТОга аъзолик аризасини муҳокама қилган.
Эслатиб ўтамиз, Анқара 2021 йил октябрь ойида F-16 қирувчи самолётлари ва уларни модернизация қилиш учун тўпламларни сўраган эди. Олти миллиард долларлик потенциал келишув 40 та қирувчи самолётни, шунингдек, 79 та жанговар самолёт учун янгилаш тўпламларини сотишни ўз ичига олади.
