Мисрда эр ўз хотинини коронавирусга чалингани учун бешинчи қаватдаги уйидан ерга улоқтирди. Аммо, 25 ёшли аёл тирик қолган. Қўшнилари аёлни шифохонага олиб борган ва у жарроҳлик амалиётини ўтказган.
Полиция бу жиноятни амалга оширган эрни ҳибсга олган ва суриштирув ишларини олиб бормоқда. Эркакнинг айтишича,у аёли билан доимий равишда жанжаллашиб келган. Аёл вирусни юқтириб олгани маълум бўлгач эса эр-хотин ўртасидаги зиддиятлар янада авж олган.
“Мен коронавирусни юқтириб олишдан қўрқдим. Аёлим уч марта тест топширди ва уларнинг ҳаммасида вирусни юқтириб олгани маълум бўлди. Шунинг учун мен ундан уйни тарк этиш сўрадим. Лекин аёлим кетмади ва мен уни ташқарига итариб юбордим”, деган эркак полицияга берган кўрсатмасида.
Ҳозирда суд аёл тўлиқ кўрсатма бериши учун унинг тузалиб карантиндан чиқишини кутмоқда.
Қоҳирадаги “Аин Шамс” университети шифохонаси жарроҳи доктор Али Мазяднинг айтишича,аёл коронавирусга чалингани учун махсус хонага жойлаштирилган бўлиб, ҳозирда у реанимацияда ва унинг тўлиқ тузалиши учун бир неча ойлар керак бўлади.
Бу воқеа коронавирус сабаб жорий қилинган карантин даврида нафақат Мисрдаги,балки бутун дунёдаги оилаларда келишмовчиликлар келиб чиқаётганини яна бир бор кўрсатди.
“Ҳозирда ҳеч қайси истироҳат боғлари ва кўнгилочар жойлар ишламаяпти. Натижада, оила аъзоларининг ҳаммаси узоқ вақт давомида бир жойда қолишга мажбур бўлишмоқда. Биз ҳаммамиз бир кемадамиз ва номаълум душман билан курашмоқдамиз. Шунинг учун биз ҳозирги вазиятда баҳамжиҳатликда яшашимиз керак”, дейди психолог Нермин Гид. Унинг сўзларига кўра,мактабларнинг ёпиқлиги, ёлғизлик, иқтисодий муаммолар ва зерикиш ҳам оиладаги келишмовчиликларнинг вужудга келишига сабаб бўлмоқда.
