Энергетика вазирлиги Бойсундаги вазиятни изоҳлади

Бугун тармоқларда Бойсундаги кондаги жараён бўйича видеолар тарқалди.

Энергетика вазирлиги изоҳ беришича,«М-25» конида вазият барқарор ва мутахассислар назорати остида.

Вазирликка кўра, ижтимоий тармоқларда Бойсун туманида газ сизиб чиқиши билан боғлиқ деб талқин қилинаётган видеолар тарқалмоқда.

Бу ҳолат «М-25» конининг 202-сон қудуғида бир ҳафта олдин кузатилган геологик жараён. Яъни, аввалдан ёқиб қўйилган оловнинг вақтинча сўниши ҳолати ҳисобланади.

Мутахассисларнинг таъкидлашича, бу ҳолат кондаги геологик жараён натижасида юз берган ва қисқа вақтда яна ёқиб қўйилган.

«Айни пайтда Бойсундаги «М-25» конида вазият барқарор бўлиб, барча жараёнлар мутахассислар назорати остида амалга оширилмоқда. Аввал хабар берганимиздек, ҳавога зарарли моддалар тарқалишининг олдини олиш мақсадида газ ёқиб қўйилган ва бу усул атроф-муҳит ифлосланишининг олдини олишда қабул қилинган стандарт амалиёт ҳисобланади ҳамда халқаро саноат хавфсизлиги талабларига тўлиқ жавоб беради», дейилади расмий хабарда.