Энди Украина қўшинлари Россиядан Белгородни тортиб олмоқда

УҚК Белгород вилоятига кириб, Демидовка аҳоли пункти чеккасида ўрнашиб олганини Z-ҳарбий мухбирлар хабар қилмоқда.

Маълум қилинишича, Украина Қуролли Кучлари Белгород вилоятининг Краснояружский туманида, Суджадан унча узоқ бўлмаган жойда жанглар олиб бормоқда. "Новая газета. Европа" телеграм каналига кўра, Илек-Кошари қишлоғи, Семейний хутори, Барилов, Новий пут, Добрино аҳолиси ўққа тутилишлардан шикоят қилмоқда. Атрофда уч кундан бери сув, алоқа, электр таъминоти ва иситиш тизими йўқ.

Гладков Краснояружский тумани аҳолисига "ҳозирча ўз уйларингизга қайтиш мумкин эмас, бу ҳаётингиз учун хавфли" деб билдирди. Унинг сўзларига кўра, тумандаги вазият мураккаб.

Украина Қуролли кучлари Бош штаби хабар беришича, 18 март куни Ҳаво кучлари Белгород вилоятининг Демидовка ҳудудида жойлашган Россия Қуролли кучлари 20-армиясининг 3-мотоўқчи дивизияси бўлинмаларидан бирининг қўмондонлик пунктига зарба берган. Натижада қўмондонлик пункти бутунлай йўқ қилинган.

«Управление Z» ҳарбий канали ёзишича, эрталаб Краснояружский тумани шимоли-ғарбидаги Демидовка қишлоғи яқинида УҚКнинг 35 кишилик гуруҳи кузатилган: "Ҳар икки томон ҳам - душман ва биз - ФПВ дронларидан жуда фаол фойдаланмоқда". «Старший погранотряда» канали хабар қилишича, украин ҳарбийлар "аждар тишлари" (ҳимоя иншоотлари) дан олдинга силжишга ва Демидовка чеккасига яқинлашишга эришган, "ўқ отишма давом этмоқда".

Z-блогер Рибар айтишича, Украина Қуролли кучлари авиацияси жанг майдонини изоляция қилиш учун Графовка қишлоғидаги кўприкни ишдан чиқарган. Шунингдек, канал маълумотларига кўра, Прилесе қишлоғи атрофида шиддатли жанглар кетмоқда.

«Два майора» каналининг ёзишича, Демидовка қишлоғи жанглар натижасида "вайронага айланган".