Эквадор Конституциявий суди эвтаназияга рухсат берди

Эквадор эвтаназияни декриминаллаштирган Колумбиядан кейин иккинчи Лотин Америкаси давлатига айланди, дея хабар беради BBC.

Конституциявий суд шифокорларга беморларнинг ўлимига ёрдам беришга рухсат беришни ёқлаб овоз берди (етти кишидан фақат иккитаси қарши бўлди).

Даъво АЛС деб аталадиган неврологик касаллик билан оғриган аёл томонидан қўзғатилган.

Амиотрофик латерал склероз (АЛС) - марказий асаб тизимининг прогрессив, даволаб бўлмайдиган касаллиги бўлиб, у юқори ва пастки двигатель нейронларига таъсир қилади, бу эса фалажга ва кейинчалик мушаклар атрофиясига олиб келади.

Ноябрь ойида Паола Рольдан судда ўлим истагини билдирган ҳолда оғриқ ва ёлғизликни ҳис қилганини айтди.

У Жиноят кодексининг эвтаназия 10 йилдан 13 йилгача озодликдан маҳрум қилиш билан жазоланадиган қотиллик деб таснифланган моддасига қарши чиқди, деб хабар беради AFP.

Суд "шунга ўхшаш вазиятни бошдан кечираётган одамни яшашга мажбур қилиш ақлга сиғмайди" деган қарорга келди.

Аксарият эквадорликлар мансуб бўлган Рим-католик черкови эвтаназияга қарши.

Эвтаназия тўғрисидаги қонун лойиҳаси энди Конгресс томонидан ишлаб чиқилиши ва тасдиқланиши керак, бу жараён кўп ойлар давом этиши мумкин.