Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Марказий Осиё атроф-муҳит ва иқлим ўзгаришини ўрганиш университети (Green University) мажлислар залида Давлат экологик экспертизаси маркази ҳамда Атроф-муҳитни муҳофаза қилиш соҳасида фаолият юритаётган ходимларни қайта тайёрлаш ва малакасини ошириш маркази ўртасида ҳамкорлик меморандуми имзоланди.
Меморандум жорий йилнинг 24-феврал куни Давлат раҳбари томонидан имзоланган Ўзбекистон Республикасининг “Экологик экспертиза, атроф-муҳитга таъсирни баҳолаш ва стратегик экологик баҳолаш тўғрисида”ги Қонуни нормаларида белгиланган экологик экспертиза фаолиятида иштирок этувчи субъектлар ходимларининг касбий билим ва кўникмаларини ошириш ҳамда уларга белгиланган тартибда малака сертификатини бериш бўйича ўзаро ҳамкорликни назарда тутади.
Сўзга чиққанлар таъкидлаганидек, янгиланган қонунда атроф-муҳитга таъсирни баҳолаш жараёни тубдан қайта кўриб чиқилди ҳамда халқаро талабларга мос равишда замонавий механизмлар билан тўлдирилди. Шу билан бирга, экологик баҳолашда иштирок этувчи субъектларнинг ҳуқуқ ва мажбуриятлари ҳам аниқ белгиланиб берилди.
Янги тартибга кўра, экологик экспертиза фаолиятида иштирок этувчи эколог-экспертлар ваколатли орган томонидан аттестациядан ўтказилиши шарт бўлади. Шунингдек, атроф-муҳитга таъсирни баҳолаш материалларини ишлаб чиқувчи ташкилотларнинг ходимлари малака сертификатига эга бўлишлари мажбурий этиб белгиланди.
Давлат экологик экспертизаси органлари томонидан 2024-йилда 32 мингга яқин экологик экспертиза хулосалари берилган бўлиб, уларнинг қарийб 700 таси экологик талабларга жавоб бермагани сабабли рад этилган. Ушбу рақамлар лойиҳачилардан юқори малака талаб этилишини, уларнинг билим ва кўникмаларини мунтазам ривожлантириш зарурлигини кўрсатмоқда.
Ҳозирда мамлакатимизда тўрт юзга яқин лойиҳа ҳужжатларини ишлаб чиқувчи тадбиркорлик субъектлари ва бошқа лойиҳа институтларида мингдан ортиқ лойиҳачилар фаолият олиб бормоқда. Шу билан бирга, эколог-экспертларга ҳам қатъий талаблар қўйилмоқда. Эндиликда улар ҳам ваколатли орган томонидан аттестациядан ўтказилиши белгиланган. Бу эса Малака ошириш марказининг масъулияти ва зиммасига юклатилган вазифалар аҳамиятини янада оширади.
Тадбир давомида таъкидланганидек, экспертиза маркази ва ўқув маркази ўртасида имзоланган ушбу ҳамкорлик меморандуми экологик экспертиза соҳасида етук ва салоҳиятли кадрларни тайёрлашга, давлат экологик экспертизага тақдим этиладиган атроф-муҳитга таъсирни баҳолаш ҳужжатларининг сифатини оширишга хизмат қилади. Бу эса, ўз навбатида, мамлакат барқарор тараққиётига ҳисса қўшади.
"Биз нефтни қаердан сотиб олишимиз, бизга энг фойдали вариантдан келиб чиқиб ҳал қилинади"
Тошкентда блогерга суд ҳукми ўқилди
Си Корея учун, Ким Тайван учун ҳа дейди
