Европа Иттифоқи етакчилари Исроил ҳукуматини Фаластин маъмуриятига тегишли солиқ ва божхона тушумларини музлатиш амалиётини тўхтатишга, Ғарбий соҳил ҳамда Шарқий Қуддусдаги кескинликни камайтиришга ва ҳарбий амалиётларни дарҳол тўхтатишга чақирди.
Брюсселда бўлиб ўтган Европа Иттифоқи саммити якунлари бўйича қабул қилинган баёнотда иттифоқ етакчилари Ғазо секторида отишмаларни тўхтатиш бўйича эришилган келишувдан мамнун эканликларини билдиришди ҳамда бу жараёнга ҳисса қўшган барча томонларга миннатдорлик изҳор этдилар.
ЕИ раҳбарлари икки давлат ечимига содиқликларини яна бир бор тасдиқлаб, Ғазога инсонпарварлик ёрдамини тўсиқсиз ва зудлик билан етказиш зарурлигини таъкидладилар. Шу билан бирга, БМТ ва унинг агентликлари ҳамда гуманитар ташкилотлар мустақил ва холис фаолият юритишлари кераклиги қайд этилди.
Баёнотда Европа Иттифоқи ЕUBAM Rafah ва ЕUPOL COPPS каби миссиялар доирасини кенгайтириш, Ғазони барқарорлаштириш, тикланиш ва қайта қуриш жараёнларига ўз ҳиссасини қўшишга тайёр эканлиги ҳам таъкидланган.
Европа Иттифоқи етакчилари шунингдек, Исроилни Фаластин аҳолисига асосий хизматларни кўрсатиш учун зарур бўлган ушлаб қолинган даромадларни озод қилишга, Шарқий Қуддус ва Ғарбий соҳилдаги кескинликни камайтиришга, кўчманчилар томонидан амалга оширилаётган зўравонликларга ва ноқонуний турар-жой қурилишларига чек қўйишга чақирдилар.
