Дунёнинг энг бой одами номи ўзгарди

Bloomberg нашри Эллисоннинг бойлигини 393 миллиард долларга, Маскнинг бойлигини эса 385 миллиард долларга баҳоламоқда. Эллисон кескин тарзда кўтарилди, чунки капиталининг бир кунлик ўсиши 101 миллиард долларни ташкил этди - бу Bloomberg рейтинги тарихидаги энг катта ўсишдир.

Агентлик рейтингида Маск деярли бир йил давомида биринчи ўринда турди. У биринчи марта 2021 йилда ушбу поғонага чиққан, бироқ кейин Amazon асосчиси Жефф Безос ва LVMH асосчиси Бернар Арнога бой берган. Ҳозир улар мос равишда тўртинчи ва саккизинчи ўринларни эгаллаб турибди.

Июл ойидан бери Эллисон Bloomberg рейтингида Meta раҳбари Марк Цукербергни ортда қолдириб, иккинчи ўринни эгаллаб келаётган эди.

Forbes нашри ҳам Эллисоннинг бойлиги ўсганини қайд этди (тахминан 102 миллиард доллар ёки умумий бойлигининг деярли 35 фоизи), унинг умумий капитали эса 395 миллиард долларга баҳоланган. Аммо Маск Forbes рейтингида ҳали ҳам 437 миллиард доллар бойлиги билан биринчи ўринда турибди.

Эллисон 81 ёшда. У 1977 йилда Боб Майнер ва Эд Оутс билан Oracle компаниясига асос солган. Миллиардер Oracle бош директори лавозимини 2014 йил сентябрида компанияни 37 йил бошқарганидан сўнг тарк этди ва директорлар кенгаши раиси ва техник директор бўлди. У Oracle акцияларининг 40 фоиздан ортиғига эгалик қилади.

Шунингдек, у Paramount Skydance компаниясининг тахминан 50 фоизига эгалик қилади. 2018-2022 йилларда у Tesla директорлар кенгаши аъзоси бўлган, ҳозирда ҳам компания акцияларига эгалик қилади.

Bloomberg нашрига кўра, сунъий интеллект ривожланиши фонида булутли инфратузилмага сармоя киритиш Oracle’га гуллаб-яшнаш имконини берган.

Эллисон азалдан республикачини қўллаб-қувватлайди.