Доналд Трампнинг ўғли Италияда ноқонуний овда гумон қилинмоқда

АҚШ президенти Доналд Трампнинг ўғли кичик Доналд Трамп Италияда ҳимояланган ҳудудда ноқонуний ов қилишда гумон қилинмоқда. Бу ҳақда Corriere della Sera газетаси хабар берди. Ушбу ҳолатни Венето вилояти минтақавий кенгаши аъзоси Андреа Дзаннони тасдиқлаган.

Кичик Трамп декабрь ойида Италияга ташриф буюрган ва Адриатика денгизи соҳилида овда қатнашган. Бир неча кун олдин АҚШнинг овга бағишланган веб-сайтларидан бири унинг қушларга, жумладан, Европа Иттифоқи ва Италия қонунчилиги билан ҳимояланган ноёб қизил ўрдакларга қарата ўқ узаётганини акс эттирган репортажни эълон қилган.

Андреа Дзаннонининг сўзларига кўра, Италияда ов қилиш ҳуқуқи фақатгина мамлакатнинг маълум ҳудудларида яшовчи фуқароларга берилган.

“Бунинг учун полиция бошқармаси томонидан берилган овчилик лицензияси талаб этилади, энг муҳими, ушбу ҳужжат фақат Италия ҳудудий аҳолисига тақдим этилади”, – дея таъкидлаган у.

Европа экологик партияси – “Яшил Европа” ушбу ҳолат бўйича Италия экология вазири Жилберто Пикетто-Фратина билан масала муҳокамасини режалаштирмоқда. Партия аъзоси, депутат Луана Дзаннелла қуйидагича баёнот берган: “Биз экология вазиридан бу ҳолат юзасидан тушунтириш беришини сўраймиз, чунки ҳимояланган турларни овлаш жиноят ҳисобланади.”