Трамп Эрон сулҳ сўраганини айтди. Теҳрон жавоб қайтарди

АҚШ президенти Доналд Трамп бугун Теҳрон Вашингтондан сулҳ сўраганини эълон қилди.

Унинг сўзларига кўра, Қўшма Штатлар Ҳўрмуз бўғози очилганда буни кўриб чиқади.

«Эроннинг янги президенти, аввалгиларига қараганда анча радикал бўлмаган ва анча ақлли бўлган ҳолда, Америка Қўшма Штатларидан сулҳ сўради! Биз буни Ҳўрмуз бўғози очиқ, эркин ва шаффоф бўлганда кўриб чиқамиз. Унгача биз Эронни йўқ қиламиз ёки, улар айтганидек, уни тош даврига қайтарамиз!», деб ёзган Трамп.

Бироқ ташқи ишлар вазири Аббос Арагчи Эрон томони ҳеч қандай сулҳ таклифини киритмаганини айтди ва Трампнинг баёнотини «ёлғон» деб атади, деб хабар беради Ал-Жазира.

31 март куни кечқурун Доналд Трамп томонлар келишувга эриша олмасалар ҳам, Эрондаги уруш икки-уч ҳафта ичида тугаши мумкинлигини айтди. АҚШ президентининг таъкидлашича, асосий нарса шундаки, Эрон томони жанглардан кейин ядровий қурол ишлаб чиқара олмаслиги керак. Шунингдек, у Ҳўрмуз бўғози орқали манфаатдор мамлакатларга юк ташишни тиклаш таклифини такрорлади.

30 март куни Доналд Трамп Эрондаги «янги ва жиддийроқ» режим билан сулҳ бўйича музокаралар олиб борилишини эълон қилди. Унинг сўзларига кўра, томонлар музокараларда муросага келишган ва агар келишувга эришилмаса, «электр станцияларини бутунлай йўқ қилиш» билан таҳдид қилишган. Бироқ, Эрон томони фақат маълум шартлар бажарилган тақдирдагина музокара олиб боришини айтди. Буларга ҳарбий ҳаракатларнинг қайта бошланмаслиги кафолати ва репарациялар тўлаш киради.