ЧДПУ абитуриентлари орасида жаҳон чемпионлари ҳам бор

Абитуриентлар учун ҳаяжонли дамлар бошланди. 2025/2026 ўқув йили учун олий таълим муассасаларига кириш синови муддатлари белгиланди. Талабаликни орзу қилган ёшлар сўнгги тайёргарликни кўрмоқда.

Айрим абитуриентлар учун эса синовлар бошланиб улгурди. Жумладан, ҳам касбий (ижодий) имтиҳон, ҳам тест синовлари ўтказилиши кўзда тутилган қатор таълим йўналишлари бўйича Чирчиқ давлат педагогика университетига кириш учун рўйхатдан ўтган абитуриентлар учун касбий (ижодий) имтиҳонлар давом этмоқда.

Абитуриентлар учун қатор қулайликлар, жумладан, касбий (ижодий) имтиҳон дастури, зарур тавсиялар ва имтиҳон натижалари ҳақида маълумотлар олиши учун https://cspu.uz/bakalavriyatt веб-саҳифаси ишга туширилган.

Имтиҳонлар ўтказилишидан 3 кун олдин абитуриентлар рўйхатдан ўтиш вақтида кўрсатган телефон рақамига хабар юборилиб, уларга имтиҳон ўтказилиш санаси, жойи ва вақти, абитуриент имтиҳон топширадиган гуруҳ рақами маълум қилинган.

Холислик ва шаффофликни таъминлаш мақсадида ҳар бир имтиҳон ўтказиш жойи кузатув камералари билан жиҳозланди. Ота-оналар учун фарзандларининг имтиҳон топшириш жараёнини https://cspu.uz/qabul-2025-online-translyatsiya саҳифаси орқали онлайн кузатиш имконияти яратилган.

Чирчиқ давлат пеагогика университети Жисмоний маданият йўналишига хужжат топширган абитуриентлар орасида жаҳон чемпионлари ҳам бор. Бу эса жаҳон ва қитъа чемпионларини келгусида спорт таълими билан шуғулланиш истаги борлигидан далолат беради.