Дания Украинага катта ёрдам пакетини эълон қилди

Дания Мудофаа вазирлиги Украинага янги артиллерия снарядлари ва ўқ-дориларни ўз ичига олган 26-ҳарбий ёрдам пакетини тақдим этишини эълон қилди.

Вазирлик веб-сайтида айтилишича, қиймати тахминан 4,2 миллиард Дания крони (тахминан 563 миллион евро) бўлган пакет Украинани қўллаб-қувватлаш жамғармаси ва Европа тинчлик жамғармаси маблағларини қоплаш доирасида молиялаштирилади.

Мудофаа вазири Троэльс Лунд Поульсеннинг айтишича, пул ўқ-дорилар, Ҳарбий ҳаво кучларининг жанговар самолётлари учун жиҳозлар ва ўқув базасини кенгайтиришга йўналтирилади:

"Афсуски, Украинанинг ёрдам ва қўллаб-қувватлашга бўлган эҳтиёжи камайгани йўқ. Мен қисқа ва узоқ муддатда жанг майдонида ўзгаришлар бўладиган хайриялар учун яна бир бор маблағ ажрата олганимиздан хурсандман ва фахрланаман. Дания уруш бошланганидан бери Украинани собит қўллаб-қувватлаб келмоқда. Биз буни келгуси йилларда ҳам давом эттирамиз" - дейилади баёнотда.