Чехия АҚШнинг Украина учун қурол сотиб олиш лойиҳасида иштирок этишдан бош тортди

Чехия АҚШнинг Украинага кейинги етказиб бериш учун Америка қуролларини сотиб олиш лойиҳасига қўшилишни режалаштирмаяпти.

Бу ҳақда республика бош вазири Петр Фиала маълум қилди.

"Чехия Украинага ёрдам беришнинг бошқа лойиҳалари ва йўлларига эътибор қаратади. Масалан, Ғарб давлатлари ҳисобидан учинчи давлатлардан сотиб олинган ўқ-дориларни етказиб бериш ташаббуси орқали - бу таклифни мамлакатимиз илгари сурган. Шу боис, ҳозирги босқичда биз Американинг ушбу лойиҳасида иштирок этишни кўриб чиқмаяпмиз", - дея таъкидлади Фиала.

Аввалроқ АҚШ президенти Дональд Трамп замонавий Америка қуролларини кейинчалик Украинага топшириш учун НАТОга аъзо мамлакатларга сотиш режалари ҳақида маълум қилганди. Лойиҳа Альянс томонидан мувофиқлаштирилади.

Эслатиб ўтамиз, Германия, Буюк Британия, Финляндия, Дания, Швеция, Норвегия, Нидерландия ва Канада аллақачон Украина учун Америка қуролларини сотиб олишни молиялаштиришга тайёрлигини билдирган.