Туркия Украинада кескинлик кучайганидан хавотирда. Бу ҳамма учун салбий оқибатга олиб келади, бир қатор Ғарб давлатлари айни вазиятда ғолиб бўлмаслигини тушуниши керак, деди ушбу мамлакат ташқи ишлар вазири Мавлуд Чавушўғли.
– Биз икки томон ҳам ҳужумга тайёрланаётганини кўряпмиз, – деди мулозим “А Haber” нашрига берган интервьюсида. – Жанговар ҳудудга қурол ва ишчи кучи юборилмоқда. Бир қатор давлатлар Украинага оғир қурол берди. Украина ўз ҳудудларини қайтариб олмоқчи, Россия референдум ўтказишини эълон қилди. Афсуски, кескинлик кучайишини кутяпмиз.
Унинг сўзларига кўра, Анқара бир томондан Украинанинг ҳудудий яхлитлигини қўллаб-қувватлайди. Иккинчи томондан воситачи сифатида, жумладан, “дон келишуви” бўйича фаол ишлаяпти.
– Танглик кучайиши ҳамма учун салбий оқибатга олиб келади, – дея қўшимча қилди Човушўғли. – Ўтган ҳафта Брюсселда НАТО йиғилишида қатнашиб, европалик ҳамкорларимизни диққат билан тингладик. Туркия раҳбари бошиданоқ айтган: урушда ғолиб бўлмайди, тинчликдан ҳеч ким ютқазмайди. Мулоқот даврасига қайтиш шарт. Бир қатор ғарб давлатлари бу рақобатда ғолиб бўлмаслигини, фақат музокара орқалигина натижага эришиш мумкинлигини тушуниши керак.
