Буюк Британиянинг собиқ бош вазири Борис Жонсон 1991 йилги чегараларни Украинага қайтариш талабидан воз кечишни таклиф қилмоқда. Бу ҳақда Daily Mail хабар берди.
Буюк Британиянинг собиқ бош вазири бу ҳақда Доналд Трамп билан музокараларига берган шарҳида қайд этди.
Жонсоннинг фикрича, Трамп Украинанинг мағлубияти АҚШ учун катта мағлубият бўлишини тушунади. Путин эса, ўз навбатида, бир вақтлар СССР таркибида бўлган мамлакатлар учун таҳдидга айланади. Айни пайтда Хитойдан Тайванга, “Ҳизбуллоҳ” томонидан эса Исроилга бевосита таҳдид юзага келади. Қўшма Штатлар эса икки йўлдан бирини танлаши керак бўлади: ё дунё етакчилигидан воз кечиш, ёки урушга киришиш.
"Трамп урушни Украина ва Ғарбга қулай шартлар асосида тугатиши мумкин. Бу шартларлар қаторида Украинага 2022 йил 24 февраль ҳолатидаги ҳудудлар назоратини қайтариш (яъни, 1991 йилги чегаралар талабидан воз кечиш) ва Украинанинг Европа Иттифоқи ҳамда НАТОга аъзо бўлиши кабиларни қайд этиш мумкин. Бунинг учун Трамп томонидан Украинага ҳарбий ёрдам ҳажми оширилиши ва Россия ҳудудига Ғарб қуроллари билан зарба бериш бўйича мавжуд чекловларни бекор қилиши керак", — дея фикр билдиради Жонсон.
Унинг сўзларига кўра, келажакда яхши қуролланган Украина армияси Европадаги Америка контингентининг ўрнини эгаллаши мумкин, бу эса Трампга маблағларни тежаш, америкалик аскарларни юртига қайтариш ва Европани ўзининг мудофаа қобилияти учун кўпроқ ҳаракат қилишга ундаш имконини беради.
Жонсон Путинга "компенсация" сифатида Украинада “рус тилида сўзлашувчилар учун махсус ҳимоя” жорий этишни, шунингдек, Россия G7 давлатлари ва НАТОнинг ҳамкори бўлган даврлардаги каби АҚШнинг Россия билан муносабатларини глобал тарзда тиклашни таклиф қилмоқда.
