Буюк Британия ва Германия 2000 кмдан ортиқ масофага учадиган ракеталарни яратмоқчи

Буюк Британия ва Германия яқин ўн йил ичида 2000 км дан ортиқ масофага учадиган янги ракеталарни ишлаб чиқади.

Бу ҳақда Буюк Британия бош вазири Кир Стармер идорасининг Германия канцлери Фридрих Мерцнинг 17 июль куни Лондонга ташрифи олдидан тарқатилган баёнотида айтилади.

"Раҳбарлар келгуси ўн йил ичида янги аниқ зарба бериш қобилиятларини ривожлантириш бўйича янги мажбуриятларни олиш ниятида. Тез ривожланиш Британия аҳолиси хавфсизлигини таъминлайди ва НАТОнинг тўхтатувчи салоҳиятини мустаҳкамлайди, шунингдек, муҳим саноат сармоялари орқали Буюк Британия ва Европа мудофаа секторини мустаҳкамлайди. Янги ишланма 2000 км дан ортиқ масофага эга бўлади, бу Буюк Британия томонидан яратилган энг илғор тизимлардан бири бўлади ", дейилади матнда.

Қайд этилишича, Мерц ташрифининг кульминацион нуқтаси икки томонлама дўстлик ва ҳамкорлик шартномасини имзолаш бўлади. Ҳужжат хавфсизлик, иқтисодиёт, миграция ва инфратузилма масалаларини қамраб олади. Бу 2024 йил 23 октябрда Лондонда имзоланган Чуқурлаштирилган мудофаа ҳамкорлиги тўғрисидаги битимнинг давоми бўлади.

Даунинг-стрит, 10-уйдаги офисда айтилишича, Буюк Британия ва Германия биргаликда ишлаб чиқарилган қуроллар, жумладан Boxer зирҳли машиналари ва Eurofighter Typhoon қирувчи самолётларини экспорт қилиш учун қўшма реклама кампанияларини бошлайди. Шунингдек, Германиянинг дрон ишлаб чиқарувчиси Stark Defense Германиядан ташқарида ўзининг биринчи заводини очиши эълон қилинди. Корхона Англия жануби-ғарбий қисмидаги Свиндон шаҳрида жойлашади.

Бундан ташқари, томонлар ноқонуний миграцияга қарши курашда ҳамкорликни кучайтиради. Стармер идорасининг таъкидлашича, йил охиригача Германия ҳукумати Буюк Британияга ноқонуний миграцияни осонлаштиришни ноқонуний қилиш ниятида.