Британия Путинни огоҳлантирди: Биз бунга йўл қўймаймиз!

Стармер: "Путин Украинада тинчлик масаласини ўйинга айлантиришига йўл қўймаслигимиз керак"

Буюк Британия бош вазири Россия президенти Владимир Путиннинг Украинада ўт очишни тўхтатиш имконияти билан "ўйин қилишига" йўл қўйиб бўлмаслигини таъкидлади, дея хабар бермоқда BBC News 15 март куни.

"Биз президент Путиннинг [АҚШ президенти Доналд] Трамп келишуви билан ўйнашишига йўл қўя олмаймиз. Кремлнинг президент Трампнинг ўт очишни тўхтатиш ҳақидаги таклифини бутунлай эътиборсиз қолдириши Путиннинг тинчликка интилмаётганини яққол кўрсатмоқда," - деди Британия бош вазири.

Агар Россия ниҳоят музокаралар столига ўтирса, бу жиддий ва барқарор тинчлик эканлигига ишонч ҳосил қилиш учун ўт очишни тўхтатиш жараёнини кузатишга тайёр бўлишимиз лозим. Акс ҳолда, Россияга иқтисодий босимни кучайтириш ва бу урушни тўхтатиш учун барча куч-ғайратимизни сафарбар этишимиз шарт.

Владимир Путин 13 март куни АҚШнинг Россия-Украина урушида вақтинчалик ўт очишни тўхтатиш режимини жорий этиш таклифини қўллаб-қувватлашини маълум қилди. Бироқ, унинг сўзларига кўра, Москва Вашингтондан айрим саволларга жавоб олишни мақсад қилган. Хусусан, Путин ўт очишни тўхтатиш режими даврида Украина армияси қандай ҳаракат қилиши билан қизиқмоқда.