Бразилиялик фермер мамлакат президентининг ғалабаси туфайли Porsche автомобилини ютиб олди

Бразилиялик фермер таниш тадбиркор билан тузган гаровида ғалаба қозониб, янги қизил рангли Porsche автомобилига эга бўлди. Бу унинг Луис Инасиу Лула да Силванинг президентлик сайловларидаги ғалабаси туфайли ютиб олган иккинчи автомобилидир.

Бу ҳақда Бразилиянинг UOL ахборот портали ёзмоқда.

Автомобиль Бразилиянинг шимоли-шарқида жойлашган Алагоас штатида яшовчи 48 ёшли фермер Антониу Синтрага насиб этди. У машинани сайловдан кейинги душанба куни, яъни овоз бериш якунланганидан бир кун ўтиб, Арапирака шаҳридаги ёқилғи қуйиш шохобчаларидан бирида қабул қилиб олди.

«Камчиликлари йўқми?» — деб сўради у гаровда ютқазган тадбиркордан.

«Йўқ. Машина янги», — деб жавоб берди у.

Фермер ушбу қувончли воқеани телефонига тасвирга олди. Бу пайтда Лула да Силванинг сайловдаги ғалабасидан хурсанд бўлган оломон «Оле, ола, Лула!» дея ҳайқирарди.

Синтранинг айтишича, у таниши билан гаровни сентябрь ойининг охирида умумий дўстларининг идорасида тузган. Фермер президентлик сайловларида сенатор Флавиу Болсонару ғалаба қозонган тақдирда рақибига 1,5 миллион Бразилия реали беришга ваъда берган. Ўз навбатида, таниши Лула да Силва тўртинчи муддатга қайта сайланса, унга Porsche автомобилини бериш мажбуриятини олган.

«Мен доимо Лулани қўллаб-қувватлаб овоз берганман, гаровдаги иккинчи иштирокчи эса Болсонаронинг ашаддий тарафдори», — деди Синтра ютқазган шахснинг исмини ошкор қилмасдан. Маълум бўлишича, у тадбиркор бўлиб, тамаки етиштириш ва ишлаб чиқариш билан шуғулланади.

Фермернинг тушунтиришича, сиёсий рақобатга қизиққан ҳар икки иштирокчи гаровга қўйилган нарсаларни гаров тузилган идора эгаси бўлган умумий дўстларига сақлаш учун топширган.

Синтра, шунингдек, 2022 йилги президентлик сайловлари арафасида ҳам Болсонарони қўллаб-қувватловчи таниши билан гаров боғлаганини ва 500 минг реаллик Ford Ram русумли йўлтанламасни ютиб олганини айтди.

Фермер модели ва ишлаб чиқарилган йилини ошкор қилишни истамаган янги Porsche автомобилига Лула раҳбарлик қиладиган Меҳнатчилар партиясининг рамзи — юлдузни ўрнатмоқчи.

Ўтган якшанба куни Бразилияда президентлик сайловларининг иккинчи тури бўлиб ўтди. Унда амалдаги давлат раҳбари Луис Инасиу Лула да Силва ғалаба қозонди. У мамлакат тарихида президентлик лавозимига тўртинчи марта сайланган биринчи раҳбар бўлди.