Бразилияда президентдан тортиб губернатор ва депутатларгача сайланмоқда

Бразилияда 4 октябрь куни ўтаётган умумий сайловларда овоз бериш участкалари олдида узун навбатлар юзага келди. Бу ҳақда CNN Brasil телеканали хабар берди.

Маълум қилинишича, мамлакатнинг турли шаҳарларида фуқаролар участкалар очилишидан анча олдин навбатга тура бошлаган. Жумладан, мамлакатнинг ғарбий ҳудудларида овоз бериш маҳаллий вақт билан соат 06:00 да бошланган.

Умуман олганда, овоз бериш жойларида вазият тинч. Бразилиянинг барча ҳудудларида, вақт минтақасидан қатъи назар, овоз бериш пойтахт вақти билан соат 17:00 да бир вақтнинг ўзида якунланади.

Бразилия президенти Луис Инасиу Лула да Силва Сан-Паулу штатида президентлик сайловида ўз овозини берди. У овоз бериш жойига маҳаллий вақт билан тахминан соат 09:00 да етиб келган. У билан бирга вице-президентликка номзод Жералду Алкмин ҳам овоз берди.

Амалдаги президентнинг асосий рақиби — ўнг кучлар номзоди, сенатор Флавиу Болсонару ҳам сайловда иштирок этди. У Бразилиянинг собиқ президенти Жаир Болсонарунинг ўғли ҳисобланади.

Жамоатчилик фикри сўровларига кўра, Лула да Силва Флавиу Болсонарудан атиги 2–3 фоиз пункт олдинда. Статистик хатоликни ҳисобга олганда, бу икки асосий номзод ўртасидаги кучлар нисбати деярли тенг эканини кўрсатади.

4 октябрь куни Бразилия фуқаролари мамлакат президенти, штатлар ва Федерал округ губернаторларини сайлайди. Шунингдек, Депутатлар палатаси таркиби янгиланади, Федерал сенатнинг учдан бир қисми ҳамда ҳудудий қонунчилик ассамблеялари депутатлари сайланади.

Зарур бўлган тақдирда, сайловнинг иккинчи тури 25 октябрь куни бўлиб ўтади.