Braziliyada 4 oktyabr kuni o‘tayotgan umumiy saylovlarda ovoz berish uchastkalari oldida uzun navbatlar yuzaga keldi. Bu haqda CNN Brasil telekanali xabar berdi.
Ma’lum qilinishicha, mamlakatning turli shaharlarida fuqarolar uchastkalar ochilishidan ancha oldin navbatga tura boshlagan. Jumladan, mamlakatning g‘arbiy hududlarida ovoz berish mahalliy vaqt bilan soat 06:00 da boshlangan.
Umuman olganda, ovoz berish joylarida vaziyat tinch. Braziliyaning barcha hududlarida, vaqt mintaqasidan qat’i nazar, ovoz berish poytaxt vaqti bilan soat 17:00 da bir vaqtning o‘zida yakunlanadi.
Braziliya prezidenti Luis Inasiu Lula da Silva San-Paulu shtatida prezidentlik saylovida o‘z ovozini berdi. U ovoz berish joyiga mahalliy vaqt bilan taxminan soat 09:00 da yetib kelgan. U bilan birga vise-prezidentlikka nomzod Jeraldu Alkmin ham ovoz berdi.
Amaldagi prezidentning asosiy raqibi — o‘ng kuchlar nomzodi, senator Flaviu Bolsonaru ham saylovda ishtirok etdi. U Braziliyaning sobiq prezidenti Jair Bolsonaruning o‘g‘li hisoblanadi.
Jamoatchilik fikri so‘rovlariga ko‘ra, Lula da Silva Flaviu Bolsonarudan atigi 2–3 foiz punkt oldinda. Statistik xatolikni hisobga olganda, bu ikki asosiy nomzod o‘rtasidagi kuchlar nisbati deyarli teng ekanini ko‘rsatadi.
4 oktyabr kuni Braziliya fuqarolari mamlakat prezidenti, shtatlar va Federal okrug gubernatorlarini saylaydi. Shuningdek, Deputatlar palatasi tarkibi yangilanadi, Federal senatning uchdan bir qismi hamda hududiy qonunchilik assambleyalari deputatlari saylanadi.
Zarur bo‘lgan taqdirda, saylovning ikkinchi turi 25 oktyabr kuni bo‘lib o‘tadi.
Aeroportda yangi tug‘ilgan chaqaloq va uning onasi vafot etdi
Ayiq ovlaganlarga pul mukofoti va’da qilindi
13 yoshli qiz egizak farzandli bo‘ldi
