БМТ Бош котиби: "Эронда намойишчиларга қарши зўравонликдан даҳшатга тушдим"

БМТ Бош котиби Антониу Гутерреш Эронда намойишчиларга қарши зўравонлик ҳақидаги хабарлардан даҳшатга тушганини айтди.

Бош котиб ўзининг ижтимоий тармоқ саҳифасида баёнот жойлаштирди.

"Мен Эрон расмийлари томонидан намойишчиларга қарши зўравонлик ва ҳаддан ташқари куч ишлатиш ҳақидаги хабарлардан даҳшатга тушдим, бу сўнгги кунларда ўлим ва жароҳатларга олиб келди. Фикр билдириш, уюшиш ва тинч йиғилишлар эркинлиги ҳуқуқлари тўлиқ ҳурмат қилиниши ва ҳимоя қилиниши керак", дейилади баёнотда.

Гутерреш шунингдек, Эрон расмийларини максимал даражада вазмин бўлишга ва кераксиз ёки номутаносиб куч ишлатишдан тийилишга чақирди. У аҳолининг ахборотга киришини таъминлаш, жумладан, алоқани тиклаш учун чоралар кўриш зарурлигини таъкидлади.

Эронда норозилик намойишлари 28 декабрь куни миллий валютанинг тўсатдан қулаши ортидан бошланди ва ўшандан бери мамлакат бўйлаб камида 46 та шаҳарга тарқалди. Хабарларга кўра, ўнлаб одамлар, жумладан, камида беш бола ҳалок бўлган ва яна кўплари жароҳатланган. 8 январь куни кечқурун республикада интернет ва мобил алоқа узилиб қолди, бу эса кучайиб бораётган зўравонлик шароитида ахборотга киришни кескин чеклаб қўйди.