Беларуслик енгил атлетикачи Тимановская Польша фуқаролигини олди. Токиодаги Олимпиада пайтида уни миллий терма жамоа раҳбариятини танқид қилгани туфайли куч билан Минскка олиб кетишга ҳаракат қилишган эди.
Кристина Тимановская ўзининг Инстаграм саҳифасида Польшада фуқаролигини тасдиқловчи ҳужжат суратини жойлаштирди. Унинг сўзларига кўра, у бир ойдан кўпроқ вақт олдин янги фуқароликни олган, бироқ буни сир тутган.
Тимановская 2021 йилда Токио Олимпиадасида Беларусь терма жамоаси раҳбариятини танқид қилган эди. Мамлакат Олимпия қўмитаси буни спортчининг "эмоционал ва психологик ҳолати" билан боғлади ва уни Япониядан Беларусга мажбуран олиб кетишга ҳаракат қилди. Токио аэропортида Тимановская маҳаллий полициядан, кейин эса Европадан сиёсий бошпана сўради.
Польша Тимановскаяга аввалига гуманитар виза, энди эса фуқароликни берди.
