Байден ва Зеленский Украинани қўллаб-қувватлаш масаласини муҳокама қилишди

АҚШ ёрдамсиз Украинани тарк эта олмайди. Бу ҳақда АҚШ президенти Жо Байден Владимир Зеленский билан Вашингтонда ўтказган қўшма анжуманида маълум қилди.

«Агар биз уни тарк қилмасак, Украина бу урушдан кучли, мағрур ва Ғарб тизимига мустаҳкам ўрнашган ҳолда чиқади. Америкаликлар Украина муваффақиятларини қўллаб-қувватлашда ўйнаган ролидан фахрланиши керак. Биз эса имкон қадар Украинани зарур техника ва қуроллар билан таъминлашда давом этамиз», — деди у.

Унга кўра, Россия АҚШнинг Украинага ёрдам бера олмаслигига пул тикмоқда. «Шунинг учун биз унинг [Россия президенти Владимир Путин] нотўғри эканлигини исботлашимиз керак. АҚШ Конгресси ёрдам бериши керак. Биз бу вазиятга бутун дунёда қандай қаралаётганини, Россия бундан қандай фойдаланаётганини тушунишимиз керак», деб таъкидлади Оқ уй раҳбари.

Шу муносабат билан Байден АҚШ Конгресси Украина учун қўшимча маблағ ажратишни маъқуллаши кераклигини таъкидлади.

Владимир Зеленский, ўз навбатида, Украина Қуролли Кучлари уруш бошидан бери Россия қўшинлари томонидан босиб олинган ҳудудларнинг 50 фоизи устидан назоратни қайтариб олгани ва Қора денгизда ҳам муваффақиятга эриша олганини таъкидлади. “Биз осмонда устунликка эришмоқчимиз, бу 2024 йилда бизнинг позициямизни мустаҳкамлайди. «Кимки осмонни бошқарса, у урушнинг давомийлигини бошқаради», деди у.

Украина президентининг айтишича, демократлар ва республикачилар уни ҳар томонлама қўллаб-қувватлашларига ишонтиришган. «Бугун мен ҳар икки партия вакиллари билан кўп гаплашдим: демократлар ҳам, республикачилар ҳам бизни ҳар томонлама қўллаб-қувватлашларига ишонтиришди. Келинг, ҳозир кўрамиз. Аммо бундан олдин биз стратегик ҳамкоримиз АҚШнинг қўллаб-қувватлашига доим ишонардик», — деди у.