Башар ал-Ассаднинг автомобиллар коллекцияси аукционда сотилди

Сотувдан тушган даромад Сурия тараққиёт жамғармасига ўтказилади.

Сурияда собиқ президент Башар ал-Ассадга тегишли нодир суперкарлардан иборат коллекция Дамашқда ўтказилган ким ошди савдосида намойиш этилди. Аукционга янги президент Аҳмад Аш-Шара мезбонлик қилди. Тадбирдан тушган маблағлар Сурия тараққиёт жамғармасига йўналтирилиши белгиланган.

Кимошди савдонинг биринчи босқичида машҳур брендларнинг учта суперкари тақдим этилди. Уларнинг энг қимматбахо автомобили — Ferrari F50 бўлиб, унинг қиймати 3–4 миллион долларга баҳоланган. Мазкур модель Формула-1 технологияси асосида ишлаб чиқилган бўлиб, атиги 349 дона мавжуд.

Шунингдек, аукционда Mercedes SL65 AMG Black Series ҳам сотувга қўйилди. Дунёда атиги 300 дона ишлаб чиқарилган мазкур автомобиль 670 от кучига эга двигател билан жиҳозланган ва бозордаги қиймати 500 минг долларни ташкил этади.

Суперкарлардан яна бири — Audi R8 бўлиб, 525 от кучига эга 5,2 литрли V10 двигатели билан тақдим этилди. Бу автомобиль ҳам коллекциянинг диққатга сазовор намунасига айланди.

Мазкур аукцион Сурияда ўтказилган энг йирик автомобиль савдоларидан бири сифатида тарихда қолди.