Арманистон Зангезур коридорини АҚШга топшириши мумкинми?

Арманистон Зангезур коридорини бошқаришни хорижий логистика компаниясига бериш имкониятини кўриб чиқмоқда. Бу ҳақда мамлакат Ташқи ишлар вазири ўринбосари Мнацакан Сафарян маълум қилди. Унинг сўзларига кўра, бу қарор Ереваннинг белгиланган принципларига мос келганда амалга оширилиши мумкин.

Бу изоҳ Бош вазир Никол Пашинян билан Озарбайжон президенти Илҳом Алиев ўртасида Абу-Дабида бўлиб ўтган тўрт соатлик музокаралар ортидан берилди. Манбаларга кўра, учрашувда Зангезур коридори мавзуси муҳим масалалардан бири бўлди.

Зангезур коридори Озарбайжоннинг асосий қисми билан Нахчувон эксклавини Арманистоннинг жанубий ҳудуди орқали боғлайди ва узоқ вақтдан бери низоли масала бўлиб келмоқда.

CaucasusWarReport маълумотларига кўра, Вашингтон томонидан таклиф этилган битимга мувофиқ, коридорнинг бошқаруви хусусий америкалик компанияга топширилиши мумкин. Бу компания Озарбайжон хавфсизлигини таъминлаши ва Арманистоннинг суверенитетини сақлаши лозим. Ушбу жараёндан Россия ва Эрон четлатилган.

Ереван коридор масаласини Арманистон ва Озарбайжон ўртасидаги тинчлик келишуви тайёргарлиги билан боғлайди. Март ойига келиб, томонлар 17 модданинг 15 тасида келишиб олган, фақат халқаро даъволар ва учинчи томонларнинг жойлашуви бўйича масалалар очиқ қолган. ОАЭдаги музокаралар натижасида чегараларни делимитация қилиш мавзуси бўйича ҳам илгарилаш кузатилмоқда.

Туркия Арманистоннинг янги ва тоброқчи ёндашувини қўллаб-қувватлади. Президент Ражаб Тоййиб Эрдўғон июл бошида айтиб ўтганидек, Арманистон аввал Зангезур коридорига қарши бўлган бўлса-да, ҳозирда иқтисодий интеграцияга нисбатан юмшоқроқ муносабатда.

• АҚШ Давлат департаменти эса аниқ режа ва америкалик компанияларнинг иштирокини шарҳлашдан воз кечиб, фақат минтақада тинчлик ва барқарорликни мустаҳкамлашга қаратилган саъй-ҳаракатларни қўллаб-қувватлашини тасдиқлади.