Миср, Иордания, Саудия Арабистони, Қатар, Бирлашган Араб Амирликлари (БАА) ва Фаластин АҚШ президенти Доналд Трампнинг фаластинликларни Ғазо секторидан араб давлатларига, жумладан Иордания ва Мисрга чиқариб юбориш режасини қатъиян рад этишларини маълум қилди.
Бу ҳақда Қоҳирадаги учрашув якунлари бўйича араб ташқи ишлар вазирларининг қўшма баёнотида айтилди.
Учрашув иштирокчилари Трамп маъмурияти ва бошқа давлатлар билан икки давлат ечимига асосланган адолатли ва кенг қамровли тинчликка эришиш учун ҳамкорлик қилишга содиқлигини таъкидладилар. Баёнотда, шунингдек, Фаластин ҳуқуқларининг поймол қилинган барча ҳолатлари рад этилганлиги таъкидланди.
Қайд этилишича, йиғилиш иштирокчилари Ғазода ўт очишни тўхтатиш ва асирларни алмашиш бўйича келишувни олқишлаган, шунингдек, Миср, Қатар ва АҚШга ушбу келишувга эришишдаги саъй-ҳаракатлари учун миннатдорчилик билдирган.
Бундан ташқари, баёнотда Исроил қўшинларининг Ғазо секторидан тўлиқ олиб чиқилиши ва Ғазони бўлиб олишга уринишларнинг тўхтатилиши муҳимлиги таъкидланган. Фаластин маъмурияти билан сектордаги масъулиятни бажариш учун ҳамкорлик қилиш зарурлиги ҳам қайд этилган.
