АҚШда конгресс аъзоларига ҳужум қилишда гумонланган шахс қўлга олинди. Унинг қўлида 70 кишининг рўйхати бор эди

АҚШда деярли икки кунлик қидирувдан сўнг 57 ёшли Венс Лютер Болтер қўлга олинди. Унга икки кишини ўлдириш ва яна икки кишини ўлдиришга уринишда айбловлар қўйилди. Терговга кўра, айнан Болтер 14 июн куни Миннесота Вакиллар палатаси аъзоси Мелисса Хортман ва унинг эри Маркни ўқотар қурол билан ўлдирган, шунингдек, штат сенаторлари Жон Хоффман ва унинг хотинига ҳужум қилиб, уларни жароҳатлаган. Унинг мотивлари ҳозирча аниқланмаган.

Болтер ташлаб кетган машинада 70 кишининг исмлари ёзилган рўйхат топилди. Ушбу рўйхатда аборт қиладиган шифокорлар, Миннесота ва бошқа штатларнинг демократ қонунчилар бор эди, дейди CNN телеканаллари. Миннесота полицияси Венс Лютер Болтерни қўлга олиш операциясини штат тарихидаги энг кенг қамровли операция деб атади.

Миннесота губернатори Тим Волз Болтер қўлга олиниши муносабати билан ёзма баёнотида шундай деди: “Мамлакат сифатида биз бу зўравонликка бефарқ қололмаймиз. Биз чуқур бўлинган миллатмиз. Сўнгги икки кун ичида бу янада аниқ кўринади.”