АҚШ ва Япония БМТ Хавфсизлик Кенгашига дунё давлатлари коинотда ядро қуролини жойлаштиришни тақиқловчи шартномага риоя қилишлари кераклигини таъкидлаган резолюцияни таклиф қилди. Бу хабар Россияга қаратилган кўринади, дея хабар беради Reuters ҳужжатга таяниб.
Вашингтоннинг фикрича, Москва коинотга асосланган сунъий йўлдошга қарши ядровий қуролларни ишлаб чиқмоқда, улардан фойдаланиш ҳарбий алоқалардан тортиб телефон алоқаларигача бўлган барча алоқаларда тартибсизлик ва узилишларга сабаб бўлиши мумкин, дея хабар беради агентлик масаладан хабардор манба.
Reuters агентлигининг эслатишича, Россия 1967 йилдаги Коинот шартномасининг иштирокчиси бўлиб, у «ядро қуроли ёки бошқа оммавий қирғин қуроллари бўлган ҳар қандай объектни Ер орбитасига жойлаштиришни» тақиқлайди.
