Украина можаросида кутилмаган ва зиддиятли бурилиш юз бермоқда. Президент Владимир Зеленскийнинг Reuters агентлигига берган интервьюсига кўра, Вашингтон Киев олдига хавфсизлик кафолатлари эвазига ўта оғир шартни қўйган.
Хабарларга кўра, АҚШ маъмурияти Украинани ўз қуролли кучларини Донбасс ҳудудидан олиб чиқишга чақирмоқда. Оқ уй фақат шу шарт бажарилгандагина кенг кўламли хавфсизлик келишувлари ва дипломатик жараёнларни бошлашга тайёр эканини билдирган. Бу ҳолат Вашингтоннинг можарони тезроқ музокаралар столига кўчириш истагидан далолат бериши мумкин.
Украина президенти бундай таклифга нисбатан ўта эҳтиёткор ва танқидий муносабат билдирди. Унинг таъкидлашича, Шарқий Украинадан қўшинларнинг чиқарилиши нафақат мамлакат мудофаасини заифлаштиради, балки бутун Европа хавфсизлик тизимини хавф остида қолдиради.
«Шарқий ҳудудлар миллий мудофаамизнинг умуртқа поғонасидир. Уларга иккинчи даражали масала сифатида қараб бўлмайди», — деди Зеленский.
Мазкур масала Майамида бўлиб ўтган АҚШ ва Украина делегацияларининг учрашувида ҳам асосий мавзулардан бири бўлган. Эътиборли жиҳати шундаки, Донбассдан қўшинларни чиқариш аввалроқ Россия томонидан тинчлик музокаралари учун асосий шарт сифатида илгари сурилган эди. Эндиликда бу талабнинг Вашингтон томонидан янграши Киев учун вазиятни янада мураккаблаштирмоқда.
Кузатувчиларнинг фикрича, АҚШ ҳарбий ёрдамни дипломатик босим билан уйғунлаштириш орқали Киевни муросага ундашга ҳаракат қилмоқда. Украина эса ҳудудий яхлитлик ва хавфсизлик масаласида ён бериш ортга қайтариб бўлмас оқибатларга олиб келишидан хавотирда.
Ҳусановнинг финалдаги ўйини қандай баҳоланди?
Эрон Трампнинг Ҳормуз бўғозини очиш ҳақидаги ультиматумига жавоб берди
АҚШ Эроннинг нефтдан тахминан 14 миллиард доллар даромад олишига имкон берди
