АҚШ Украина бўйича икки босқичли режа эълон қилди

Кеча АҚШ Давлат котиби Марко Рубио CВС телеканалига берган интервьюсида Россия – Украина зиддиятини ҳал қилиш бўйича тузилган А ва Б режаларни баён қилди.

– А режаси – ўт очишни тўхтатиш, – деди у. – Шундан кейин иккинчи босқич – Б режасига ўтилади. Яъни, барчани музокара даврасида тўплаш керак.

Қўшимча қилинишича, можаро тамомила якунланадиган, ҳамма томон манфаати ҳурмат қилинадиган йўлни топиш зарур.

Шунингдек, жанг давом этса, кейинги режага ўтиш қийин кечиши таъкидланди.
Куни кеча Президентнинг махсус вакили Стив Уиткофф Путин ва Трамп шу ҳафта қўнғироқлашиши мумкинлигини маълум қилди. Унинг ишонтиришича, Оқ уй раҳбари Украина инқирози бир неча ҳафта ичида ҳал этилишини кутяпти.
Пайшанба куни кечқурун Россия раҳбари Москвада Оқ уй махсус вакилини қабул қилди. Кремль матбуот котиби Дмитрий Песков Уиткофф Украина бўйича қўшимча маълумот бергани, Путин ҳам Трампга тегишли маълумот ва қўшимча сигнал етказганига аниқлик киритди.

Ўз навбатида Дональд Трамп дам олиш кунлари кўп иш қилинганини таъкидлаб, урушга барҳам бериш учун “жуда яхши имконият” борлигини айтди.
– Биз бир саволга жавоб топишни истаймиз: Бу урушни тугата оламизми ёки йўқ? – деган Трамп журналистларга. – Балки уддалай олмасмиз, эҳтимол қила олармиз. Менимча, бизда жуда яхши имконият бор.

Оқ уй раҳбари россиялик ҳамкасби билан сешанба кунга режалаштирилган мулоқотида ҳудудлар ва атом электр станциялари устидан назорат масаласини ҳам муҳокама қилмоқчи, деб ёзди “Reuters” агентлиги.

Агар Россия ўт очишни тўхтатишга розилик беришдан бош тортса, АҚШ РФга қарши турли чоралар кўриши мумкинлигидан огоҳлантирмоқда. Масалан, Миллий хавфсизлик бўйича маслаҳатчи Майк Уолтц “Fox News” телеканалига мухбирига “Албатта, барча йўллар кўриб чиқилмоқда”, деган.

Пайшанба куни АҚШнинг яна бир юқори мартабали вакили – молия вазири Скотт Бесцент CNBC телеканалига интервью бераркан, АҚШ Россияга нисбатан санкция босимини энг юқори нуқтага чиқаришдан тоймаслигини таъкидлаган. Унинг айтишича, Президент Дональд Трамп келишув музокарасида муваффақиятга эришиш учун ҳар икки томонга “имкон даражасида босим ўтказиш” ниятида.

Экспертлар фикрича, Америка маъмурияти томонидан Украинада тинчлик ўрнатиш йўлида амалга оширилаётган саъй-ҳаракатнинг дастлабки натижаси шу ҳафта анча ойдинлашади. Воқеалар ривожи шунга ишора қилмоқда.