АҚШ томонидан ХЖС судяларига нисбатан жорий этилган санкциялар суднинг мустақиллигига таҳдиддир

Бу ҳақда Халқаро Жиноий суднинг расмий сайтидаги эълон қилинган баёнотда қайд этилди.

Гап Қўшма Штатларнинг ХЖС Апелляция палатасининг тўрт судясига қарши киритган санкциялари ҳақида бормоқда. Бу судялар Исроил бош вазири Бинямин Нетаняҳу ва собиқ мудофаа вазири Йоав Галантга нисбатан чиқарилган ҳибсга олиш ордерларига қарши шикоятларни кўриб чиқмоқда. Санкция эълон қилинган судялар Бенин, Уганда, Перу ва Словения фуқаролари ҳисобланади.

"Адолат учун курашаётган инсонларга қарши ҳужумлар можаролардан азият чекаётган тинч аҳолига фойда келтирмайди. Аксинча, бундай чора-тадбирлар жазосизликка умид қилаётганларни рағбатлантиради", дейилади суд баёнотида.

Халқаро Жиноий суд Вашингтоннинг ҳаракатларини “суд ишларига бевосита аралашув” деб атаган ва бу ҳолат 125 давлат томонидан тасдиқланган халқаро суд тизимининг мустақиллигига путур етказишини билдирган.

Нидерландия ва Словения ҳам Қўшма Штатларнинг бу ҳаракатларини танқид қилган. Нидерландия Ташқи ишлар вазири Каспар Велдкамп мамлакат санкцияларни қўллаб-қувватламаслиги ва халқаро судларнинг мустақиллигини ҳимоя қилишини билдирган. У шунингдек, Нидерландия – ХЖС жойлашган давлат сифатида суд ишини узлуксиз давом эттиришини таъкидлаган.