Республикачилар партияси етакчиси Кевин МакКартини АҚШ Конгресси Вакиллар палатаси спикери этиб сайлаш учун ўтказилган овоз бериш кетма-кет олтинчи марта муваффақиятсиз якунланди. Вакиллар палатаси аъзолари икки кундан бери спикерни танлай олмаяпти, деб хабар бермоқда Reuters.
Овоз беришнинг сўнгги босқичи якунига кўра, Маккарти 201 нафар республикачи томонидан қўллаб-қувватланди. Унга ғалаба қозониш учун 218 та овоз етмади.
Республикачилар партиясининг яна бир вакили Байрон Доналдс партиядошларидан 20 та овоз тўплади. Яна бир республикачи номзодни қўллаб-қувватлашдан бош тортди.
Барча демократлар Вакиллар палатасида ўз партияси етакчиси Ҳаким Жеффрисга овоз берди.
Яна бир муваффақиятсиз раунддан кейин конгрессменлар янги овоз беришни 5 январь куни тушгача қолдиришга қарор қилишди.
АҚШ президенти Жо Байден вазиятни изоҳлар экан, Вакиллар палатаси спикери сайланиш жараёни чўзилиб кетганини шармандалик деб билиши, шу сабабли АҚШ Конгресси қуйи палатаси иши фалаж бўлиб қолганини таъкидлади.
“Конгресс ишлай олмайдиган вазият шунчаки шармандали. Биз дунёдаги энг буюк давлатмиз. Бу қандай бўлиши мумкин?" — деди Байден.
