АҚШ етакчиси билан "ажойиб суҳбат" ўтказилди

Мексика президенти Шейнбаум АҚШ етакчиси Трамп билан хавфсизлик ва наркотрафик масалаларида "ажойиб суҳбат" ўтказганини айтди.

Мексика президенти Клаудия Шейнбаум Х ижтимоий тармоғидаги саҳифасида АҚШ президенти Доналд Трамп билан Мексика суверенитетини ҳурмат қилган ҳолда хавфсизлик масалалари, наркотрафик, шунингдек, савдо ва инвестисия мавзуларини муҳокама қилганини ёзди.

Кейинроқ Шейнбаум кундалик матбуот анжуманида Трампнинг ҳарбий ҳаракатлар бўйича таклифларини рад этганини ва Қўшма Штатларнинг Мексикага ҳарбий аралашувини тўхтатишга эришганини айтди. Бундан ташқари, Шейнбаум агар АҚШ бунинг аксини билдирса, у яна қўнғироқ қилишини қўшимча қилди.

Трамп ўтган ҳафта Fox News телеканалига берган интервюсида Мексикани картеллар бошқараётганини таъкидлаб, АҚШ уларга қарши курашиш учун Мексика ҳудудидаги объектларга зарба бериши мумкинлигига ишора қилган эди.