АҚШ дронлар борасида Украина ва Россиядан ортда қолмоқда

Бу ҳақда Politico нашри маълум қилди.

“Кўплаб экспертларнинг фикрича, америкалик ҳарбийлар нафақат дронлардан фойдаланиш, балки украиналиклар ва россияликлар аллақачон ўзлаштириб олган мураккаб қурилмаларни ишлаб чиқишдан ҳам йироқ.

Улар орасида душман танклари ва техникасини йўқ қилиш учун мўлжалланган камикадзе дронлари, миналар ўрнатишга ҳамда ўқ-дори ва дори-дармон етказиб беришга қодир ер усти дронлари, кичик дронларни фронт ортига олиб ўта оладиган йирик дронлар ва бошқалар бор”, деб ёзади нашр.

Мудофаа вазири Пит Хегсетнинг тан олишича, бугунги кунда АҚШ армиясида замонавий жанг майдонининг асосий қуроли ҳисобланган "ўлдирувчи кичик дронлар" мавжуд эмас. Уларнинг йўқлигида собиқ президент Жо Байден маъмуриятини айбламоқда. Унинг таъкидлашича, Байден маъмурияти "бюрократияни қўллаган" бир пайтда, "рақиблар ҳар йили биргаликда миллионлаб арзон дронларни ишлаб чиқармоқда".

Бундан ташқари, Хегсет Россия-Украина можароси тажрибасига асосланиб, дронларга арзон, бир марталик ва оммавий ишлаб чиқариладиган ўқ-дорилар сифатида қараш кераклигини таъкидлади.