АҚШ билан янги ер ости бойликлари бўйича битим лойиҳасига бутун мамлакатдаги нефт ва газ конлари киритилган

Бу ҳақда Украина Олий Радаси депутати Ярослав Железняк маълум қилди.

Депутатнинг маълум қилишича, АҚШ билан ер ости бойликлари бўйича янги келишув лойиҳасига нафақат янги, балки мавжуд нефт ва газ захиралари ҳам киритилган.

"Кеча мен ушбу ҳужжатни расмийларимиздан олдим. Менинг маълумотларимга кўра, 23 март санаси қўйилган 58 бетли бу ҳужжат бизга Вашингтондан юборилган ва ер ости бойликлари бўйича янги келишув лойиҳаси сифатида таклиф этилган. Кейин унинг тақдири нима бўлгани номаълум", — дейди Железняк.

Унинг сўзларига кўра, ҳужжатда барча турдаги қазилма бойликлари ҳақида сўз боради.

"Яъни у ерда нефт ҳам, газ ҳам бор. Янги ва мавжуд конлар ҳам киритилган. Бутун Украина ҳудуди бўйлаб", — деб ёзади у.

Железнякнинг таъкидлашича, мазкур битим муддатсиз амал қилади ва унга фақат Вашингтоннинг розилиги билан ўзгартириш киритиш мумкин. Шунингдек, ҳужжатда Қўшма Штатларнинг Украинага хавфсизлик кафолатлари беришига доир банд йўқлиги айтилади. "Ҳатто шунга ишора қилувчи биргина жумла ҳам йўқ", — дейди у.

Маълумот учун, Украина ва АҚШ ўртасида ер ости бойликларига оид келишувнинг имзоланиши Украина президенти Володимир Зеленскийнинг Вашингтондаги тортишувидан кейин тўхтаб қолган эди.

Трамп ва Зеленский тортишувдан кейин биринчи марта 19 март куни, телефон орқали суҳбатлашишди. 24 мартда эса Трамп Украина билан келишувга эришилганини ва у "яқин орада" имзоланишини эълон қилганди.