БААда Ўзбекистон фуқароларига чиқарилган ўлим жазоси ҳукми устидан автоматик апелляция киритилган

Бу ҳақда Бирлашган араб Амирликларининг WАМ агентлиги хабар берди.

"Абу-Даби федерал апеллясия суди Давлат хавфсизлик палатаси Молдова-Исроил фуқароси Сви Коганни ўғирлаш ва ўлдиришда айбланган уч нафар Ўзбекистон фуқаросига ўлим жазоси, тўртинчи судланувчига эса умрбод қамоқ жазосини тайинлади. Бирлашган Араб Амирликлари қонунчилигига кўра, ўлим жазоси ҳукмлари устидан автоматик равишда апелляция қилинади ҳамда кўриб чиқиш ва қарор қабул қилиш учун Федерал Олий суднинг жиноят ишлари бўйича коллегиясига юборилади", деб ёзди агентлик.

Эслатиб ўтамиз, Исроил ва Молдова фуқаролигига эга бўлган 28 ёшли раввин Цви Коган (Абу-Дабидаги “Хобод” яҳудий диний ҳаракатининг вакили бўлиб, бир неча йил БААда яшаган) 2024 йил ноябр ойида Дубайда бедарак йўқолган, унинг жасади бир неча кундан кейин Уммон билан чегарадош Ал-Айн шаҳрида топилганди. БАА қотилликда гумондор сифатида уч нафар ўзбекистонликни қўлга олди. Исроил ҳукумати раввиннинг ўлдирилишини “аксилсемит теракт ҳаракати” деб атаган.