Андижонда 329 млн сўмлик сифатсиз табиий газ сотган шохобча аниқланди

Андижон вилоятида фаолият юритаётган автомобилларга газ тарқатиш компрессор шохобчасида сифати кафолатланмаган маҳсулот сотилишининг олди олинди. Бу ҳақда Техник жиҳатдан тартибга солиш соҳасида назорат инспекциясининг матбуот хизмати хабар берди.

Қайд этилишича, инспекциянинг Андижон вилояти ходимлари томонидан «S.F» МЧЖ (номи ўзгартирилган)га қарашли автомобилларга газ тарқатиш компрессор шохобчасида текширув ишлари ўтказилган. Натижада, мазкур шахобча томонидан 329 млн сўмлик мувофиқлик сертификатисиз ички ёнув двигателлари учун сиқилган табиий газ маҳсулоти реализация қилингани аниқланган.

Шундан сўнг, МЧЖга мувофиқлик сертификатисиз ички ёнув двигателлари учун сиқилган табиий газ маҳсулоти реализация қилинишини тақиқлаш ва маҳсулотни мажбурий тартибда сертификатлаштириш юзасидан ёзма кўрсатма берилган.