"Ан-Наср" Роналдунинг жароҳат олганини эълон қилди

"Ан-Наср" клуби ҳужумчи Криштиану Роналду жароҳат олганини маълум қилди.

Португалия терма жамоасининг 41 ёшли форварди Саудия Арабистони чемпионати 24-тури доирасидаги "Ал-Фейҳа"га қарши кечган (3:1) учрашувнинг 81-дақиқасида ноқулайлик сезгани сабабли алмаштирилган эди.

Бугун Саудия клуби Криштианунинг сон орқа қисмидаги мушаклари жароҳатланганини эълон қилди. Футболчи тикланиш жараёнини бошлади, унинг ҳолати тиббий ходимлар томонидан ҳар куни қайта баҳолаб борилади.

Роналду жорий мавсумда лига доирасидаги 22 та ўйинда иштирок этиб, 21 та гол уришга муваффақ бўлган.