Sevimli TV телеканали орқали 16 ойдан буён эфирга узатилаётган "Чуқур" сериалининг намойиши тўхтатилди. Телеканал ходимларининг сўзларига кўра, амалдорлар жанг саҳналари кўплиги туфайли фильмни тўхтатишга буйруқ беришган.
Уч ой аввал Zo'R TV телеканали яна бир турк сериали "Қора севги"нинг намойишини "ҳақиқий ислом ва ўзбек миллий минталитетига тўғри келмагани сабаб" тўхтатган эди.
Sevimli TV телеканали маълум қилишича, бир неча кун олдин намойиши тўхтатилган "Чуқур" сериали бошқа эфирга чиқмайди.
Бу сериал Sevimli телеканалида 2019 йилнинг 13 июнидан бошлаб намойиш этилаётган эди. Ўтган давр мобайнида сериалнинг иккита мавсуми эфирга узатилди. Томошабинлар иккинчи мавсумнинг 57-қисмини томоша қилишга улгуришди.
"Мен "Чуқур" сериали намойишининг тикланиши тарафдориман. Sevimli телеканалининг бу қароридан норозиман", деб ёзади Фейсбук фойдаланувчиларидан бири.
29 октябрь куни Sevimli телеканали ходими берган маълумотга кўра, турк сериалининг намойиши "эфир жадвалининг янгилангани" сабаб тўхтатиб қўйилган.
- Биз яқинда эфир жадвалига ўзгартириш киритдик. Шу сабаб хозирча жадвалда "Чуқур" сериали учун жой топилмаяпти, - деган телеканал ходими.
Бироқ, телетомошабинларнинг сўзларига кўра, 28 октябрь куни телеканал "Чуқур" сериалини бошқа бир сериал билан алмаштирган.
"Телеканал ходимлари ҳаммани алдаяпти. Кеча уларга қўнғироқ қилганимда, сериални сотиб олиш учун пуллари йўқлигини айтишди... Наҳотка бошқа бир сериални сотиб олишга пул топган телеканал "Чуқур" сериали учун маблағ топа олмаган?" - деб ёзади Facebook фойдаланувчиси FarruxSoyipov.
Телеканалнинг бошқа бир ходими серилада уриш саҳналари кўплиги сабаб эфирдан олиб ташланганини айтган.
- Мен ўзим бошқа бир бўлимда ишлайман. Билишимча, юқори даражадаги раҳбарлардан бирига сериладаги жанг саҳналари кўплиги ёқмаган. Шу сабаб улар бу сериални тўхтатишди. Хозир улар таҳририятга мурожаат қилган томошабинларни яқин орада сериал намойиши тикланишини айтиб, алдашмоқда. Ҳар куни таҳририятга кўплаб қўнғироқлар бўляпти. Бу сериални ютубда томоша қилиш учун ҳамманинг ҳам уйида интернет йўқ. Сўнгги бир ярим йил ичида улар бу сериалга ўрганиб қолишган. Томошабинлар сериал тўсатдан тўхтатиб қўйилгани учун телеканалдан хафа бўлишяпти.
Қайд этиш лозимки, юртимизда сериалларнинг тўхтатиб қўйилиши билан боғлиқ биринчи ҳодиса эмас.
Масалан, уч ой олдин ZO’R TV телеканали "Қора севги" номли турк сериалини тўхтатган эди.
ZO’R TV телеканалида намойиш этилган "Ҳовли" турк сериали ҳам томошабинларда катта норозилик келтириб чиқарган эди. Шундан сўнг телеканал раҳбарияти сериал намойишини бироз кейинга суришга мажбур бўлган.
ca-news.org
