Алишер Қодиров дабдабали тўйлар учун ҳашамат солиғини жорий этишни таклиф қилди

Ўзбекистонда дабдабали тўйларни тартибга солиш мақсадида аҳолига буни иллат эканини сингдириш ёки чеклов сифатида ҳашамат солиғини жорий этиш керак. Бу ҳақда 16 январь куни «Миллий тикланиш» демократик партияси томонидан ўтказилган матбуот анжуманида партия раиси Алишер Қодиров таъкидлади.

«Партиямизнинг дабдабали тўйлар борасида ўз қараши бор ва бундан кечганимиз йўқ, бу бизнинг принципиал ёндашувимиз. Халқимизнинг ўзи тушуниб етиши керакки, хўжакўрсинга — кимларгадир ниманидир исботлаш учун сарф қилиш замони ортда қолди. Кўрпага қараб оёқ узатиш керак, деган нақлни халқимиз тўғри тушуниши лозим. Ҳеч ким бир-бирига кўрсатиш учун тўй қилиши керак эмас. Даромадимизни фақат тўйларга исроф қилиш миллатимизнинг оғриқли иллатларидан бири эканини ҳар доим таъкидлаб келганмиз», — дейди Қодиров.

У ҳашамат солиғини жорий этиш таклифи ҳақида гапираркан, тўйга келган ҳар бир меҳмон учун солиқ ҳисобланиши кераклигини қайд этди.

«Тўйдан мақсад икки ёшнинг никоҳини жамоатчиликка эълон қилишми, эълон қилайлик. Буни тўртта одам билан ўтказасизми, бойлигингиз ошиб-тошиб кетган бўлса, ҳаммани чақириб, элга ош берасизми, марҳамат. Лекин чеклов томони солиқлар билан бўлиши лозим. Бизнинг таклифимиз бошидан шунақа бўлган: luxury tax, яъни ҳашамат солиғини [жорий этиш]. Ҳашаматни хоҳлаяпсизми, унинг солиғини ҳам ҳашаматли қилиб тўланг. Масалан, 10 минг одамни чақириб тўй қилмоқчимисиз? Тўйда одам бошига қараб солиқ ҳисоблансин. 10 минг одамнинг солиғини тўлаб қўйинг-да, кейин шунча меҳмон билан тўй қилаверинг», — дейди у.

«Аввало, халқимизнинг ўзи тушуниб етиши керак. Кимгадир ҳавас қилиб ёки эргашиб, минг кишини йиғиб, сарф қилгунча, ўша пулни фарзандингизни ўқишига ишлатинг ёки машина олиб беринг, уй-жой билан таъминланг, деган нарсани одамларга сингдиришимиз керак. Бизнинг бу қарашимиз қандайдир протоколлар ёки ҳужжатлар билан бўлмайди. Бу манфаатларни тўғри тақсимлаш ва тўғри бошқариш орқали эришилиши керак бўлган нарса», — дея қўшимча қилди Алишер Қодиров.

У ҳашамат солиғи қачон жорий этилиши ҳақидаги саволга изоҳ бераркан, «Биз таклифимизни берамиз ва буни керакли жойларда ҳимоя қиламиз. Лекин бу таклифни қабул қилиш ё қилмаслиги даражасида кўп эмасмиз, билиб турибсиз. Аммо ҳамма жойда шу фикрларимизни айтамиз», — дейди партия раиси.