Агар АҚШ музокараларга жиддий ёндашаётган бўлса, Теҳрон шартларини қабул қилиши керак

Эрон Олий хавфсизлик кенгаши раисининг ўринбосари Али Боғери АҚШ Эрон билан жиддий музокараларни бошлаш учун Теҳрон илгари сурган еттита шартни қабул қилиши ва бажариши кераклигини билдирди.

Боғери бу ҳақда Эрон давлат телевидениеси эфирида Эрон ва АҚШ ўртасидаги музокараларнинг ҳозирги ҳолатини шарҳлар экан, маълум қилган.

«Агар АҚШ музокаралар олиб бориш ва адолатли келишувга эришиш ниятида жиддий бўлса, биз илгари сурган еттита шартни қабул қилиши ва бажариши керак», — деди Боғери.

У ўз позициясини АҚШнинг «ўтмишдаги хатти-ҳаракатлари» ва музокаралар билан боғлиқ мажбуриятларни бир неча бор бузгани билан изоҳлади.

Боғерининг сўзларига кўра, АҚШ ўтган баҳорда беш раунд музокарадан кейин иккинчи марта уруш бошлаган. Кузда эса дипломатик жараён давом этаётган бир пайтда музокаралар тамойилларига зид қадамлар ташлаган.

Эронлик расмийнинг таъкидлашича, жиддий музокараларни бошлаш учун Вашингтон Теҳрон томонидан илгари сурилган еттита шартни қабул қилиши ва бажариши лозим. Агар АҚШ ушбу шартларга рози бўлиб, уларни амалга оширса, шундан кейингина музокаралар жараёни бошланиш-бошланмаслигини баҳолаш мумкин бўлади.

Акс ҳолда, Боғерининг фикрича, Вашингтон ўзининг сиёсий манфаатларига мос вақтинчалик келишувга эришишга интилади. Сайловлардан кейин эса босим ўтказиш сиёсатига ёки ҳарбий аралашувга қайтиши мумкин.

Теҳрон Вашингтонга тақдим этган еттита шарт қуйидагилардан иборат:

1. Денгиз блокадасини бекор қилиш.
2. Тижорат ва нефть ташувчи танкерларнинг Ҳурмуз бўғози орқали хавфсиз ўтишини таъминлаш.
3. Бир томонлама санкцияларни бекор қилиш.
4. Нефть экспортига қўйилган чекловларни олиб ташлаш.
5. Эроннинг музлатиб қўйилган активларини қайтариш.
6. Ядровий материалларни мамлакат ҳудудида сақлаш.
7. Урушни тўхтатиш.