Афсонавий актёр Дҳармендра вафот этди

Ҳиндистонлик актёр Дҳармендра (тўлиқ исми - Дҳармендра Кевал Кришан Деол) 89 ёшида вафот этди, деб хабар берди Hindustan Times. Нашр маълумотларига кўра, икки ҳафта олдин актёр ўзини ёмон ҳис қилгани учун Мумбайдаги шифохонага ётқизилган. Variety газетасининг ёзишича, актёрнинг нафас олишида муаммо бўлган.

Ҳиндистон бош вазири Нарендра Моди актёрнинг оиласига ҳамдардлик билдирди. «Дҳармендра Жи ўлими ҳинд киносида бутун бир даврнинг тугашини билдиради. У машҳур шахс, ҳар бир ролига жозиба ва чуқурлик олиб кирган феноменал актёр эди», деб ёзди Моди Х ижтимоий тармоғида.

Дҳармендра кинодаги фаолиятини 1960-йилларда бошлаган. У 250 дан ортиқ филмларда рол ўйнаган. Улар орасида ўзбекистонликларга яхши таниш «Зита ва Гита», «Қасос ва қонун», «Севимли Ража», «Битта умр кам бўлганда» каби филмлар бор.

1980-йилларда у Vijayta Films продюсерлик компаниясига асос солди. Актёрлик ва продюсерликдан ташқари, Дҳармендра сиёсат билан ҳам шуғулланган. 2004 йилдан 2009 йилгача у Ҳиндистон парламентининг қуйи палатаси аъзоси ва «Бҳаратия Жаната» партияси вакили бўлган.