Аббос Хамасдан қуролларни топширишни талаб қилмоқда

Бағдодда бўлиб ўтган Араб Лигаси саммитида Фаластин президенти Маҳмуд Аббос ҲАМАСни Ғазо устидан назоратдан воз кечиб, қуролларни Фаластин маъмуриятига топширишга чақирди.

Фаластин президенти Маҳмуд Аббос ҲАМАСни Ғазо сектори устидан назоратдан воз кечишга ва қуролларини ташлашга чақирди. Бу ҳақда у Ироқ пойтахти Бағдодда бўлиб ўтаётган Араб давлатлари лигасининг 34-саммитида айтиб ўтди.

"Биз ҲАМАСни Ғазо устидан назоратдан воз кечишга ва барча гуруҳларни қуролларини (Фаластин) маъмуриятига топширишга чақирамиз", деди Аббос Исроилнинг ҳужумлари ва фаластинликларни кўчириш режаларини шарҳлар экан.

Унинг таъкидлашича, Фаластин масаласи экзистенсиал таҳдидга дуч келмоқда. "Ғазо секторидаги геноцид ва Ғарбий Соҳилдаги аҳоли пунктлари мустамлакачилик лойиҳасидир", - деди Фаластин президенти.

Аббос Ғазода узоқ муддатли ўт очишни тўхтатишга ва “араб режаси” деб аталган барча маҳбусларни озод қилишга чақирди. Шунингдек, у минтақага инсонпарварлик ёрдамини қайта тиклашни талаб қилди.

Фаластин президенти Ғазо секторини қайта тиклаш режасини молиялаштириш ва амалга ошириш учун Қоҳирада халқаро конференсия ўтказишни таклиф қилди.

Унинг сўзларига кўра, Исроилнинг ҳаракатлари – қотиллик ва мажбуран кўчирилиши – икки давлат ечимини бузишга қаратилган лойиҳанинг бир қисмидир.

“Биз ягона тизим, ягона қонун ва ягона армия бўлишини истаймиз”, - дейди Аббос. У Ғарбий Соҳил ва Қуддусдаги ислоҳотлар ва ривожланиш дастурларини молиялаштиришга чақирди.

Фаластин раҳбари, шунингдек, келаси йили президентлик ва парламент сайловларини ўтказишга тайёрлигини маълум қилди.

"Биз Ғарбий Соҳил, Ғазо ва Қуддусда зарур шарт-шароитлар яратилиши билан келаси йил президентлик ва парламент сайловларини ўтказишга тайёрмиз. Биз давлат институтларини ислоҳ қилишни давом эттирамиз", - дея таъкидлади у.

Бағдодда бўлиб ўтадиган Араб Лигасининг 34-саммити иштирокчилари Исроилнинг Ғазодаги ҳужумларига сиёсий баҳо бериши, шунингдек, Ливан ва Суриядаги воқеаларни муҳокама қилиши кутилмоқда.

Саммит АҚШ президенти Доналд Трампнинг Яқин Шарққа ташрифи фонида ўтмоқда. 13-16 май кунлари Саудия Арабистони, Қатар ва Бирлашган Араб Амирликларида бўлди.

Америка раҳбари кутилганидан фарқли ўлароқ, сафари давомида ўт очишни тўхтатишга чақирмаган. Аксинча, Исроил Ғазо секторига ҳужумларини кучайтирди.

16 май куни Исроил армияси “Гидён араваси” операцияси бошланганини эълон қилди. Ҳарбийлар операция натижасида фаластинликлар Ғазодан чиқариб юборилиши ва минтақа устидан доимий назорат ўрнатилишини айтди.

Фаластин соғлиқни сақлаш вазирлиги маълумотларига кўра, сўнгги уч кун ичида Ғазода 400 дан ортиқ одам ҳалок бўлган.