400 минг нафар Украина фуқароси мамлакатни тарк этиши мумкин — Bloomberg

Украина зарур қўшимча энергия қувватини ошира олмайди ва қишгача электр таъминотидаги узилишлар муаммосини ҳал қила олмайди. Шу сабабли яна 400 мингга яқин одам мамлакатни тарк этиши мумкин, деб ёзади Bloomberg.

«Йил охиригача керакли қўшимча қувватга эришиш деярли мумкин эмас», деди агентликка киевлик энергетика бўйича таҳлилчи Денис Саква.

Мақолада, шунингдек, Украина Миллий банки прогнозларига кўра, 2024 йилда электр таъминотидаги узилишлар ва инфратузилмага зарар етказилиши сабабли яна 400 минг киши мамлакатни тарк этиши аниқланган.

«Ҳокимият июнь ойида электр энергияси тарифларини деярли икки баравар ошириб, вазиятни ёмонлаштирди, бу эса жамоатчиликнинг ғазабини бостиришга ёрдам бермади», - дея қўшимча қилади Bloomberg.

Украинада энергия тизимидаги танқислик туфайли барча ҳудудларда ўчириш жадваллари мунтазам равишда қўлланилади. Муҳим инфратузилма корхоналари, шунингдек, ўз эҳтиёжлари учун электр энергиясининг 80 фоизини импорт қилувчи саноат корхоналари бундан мустасно.

2022 йил октябрь ойидан бери Россия қўшинлари Украинанинг энергетика, мудофаа саноати, ҳарбий қўмондонлик ва алоқа объектларига зарбалар бермоқда. «Укрэнерго» илгари тан олганидек, энергетика объектларига этказилган зарар жуда катта, электр станциялари ва подстанциялар қувват чегарасида ишламоқда.