Туркия ҳукумати Сурияга ёрдам кўрсатишнинг мувофиқлаштириш механизмини яратди. Бу ҳақда республика Ташқи ишлар вазири Ҳакан Фидан маълум қилиб, Европа Иттифоқининг яқин кунларда Дамашққа нисбатан киритилган санкцияларнинг бир қисмини бекор қилишига умид билдирди.
"Умид қиламизки, АҚШнинг Сурияга қарши санкциялари қисман бекор қилинганидан сўнг, яқин кунларда Европа Иттифоқи ҳам бир қатор чекловларни олиб ташлайди. Туркия Сурияга транспорт, энергетика ва соғлиқни сақлаш каби соҳаларда тезкор ёрдам кўрсатиш учун мувофиқлаштириш механизмини ишга туширди. Сурияликлар бизнинг биродарларимиздир ва, албатта, Суриянинг барқарор ва иқтисодий жиҳатдан ривожланиши биз учун ҳаётий аҳамиятга эга. Ишончим комилки, Туркиянинг саъй-ҳаракатлари, хоҳ мустақил равишда, хоҳ ҳамкорлар билан биргаликда бўлсин, ўз натижасини беради," дея вазирнинг сўзларини TRT Haber телеканали келтирмоқда.
Фидан Сурияда инклюзив ҳукумат шакллантирилиши, унинг ҳудудий яхлитлиги ва суверенитетининг сақланиши, шунингдек, аксарияти мамлакатнинг шимолида фаолият юритаётган барча қуролли тузилмаларнинг ягона бошқарув остида бирлаштирилиши тарафдори эканлигини билдирди. "Биз ҳеч иккиланмасдан, Туркияга яқин бўлган тахминан 80 минг кишилик гуруҳларга миллий армияга қўшилишни ва мамлакатда ҳеч қандай тартибсизликларга йўл қўймасликни айтдик," - дея таъкидлади Туркия ТИВ раҳбари.
