Zelenskiy saylovga tayyorgarlik ko‘rishni buyurdimi?

“Xalq xizmatchisi” fraksiyasi rahbari Zelenskiy saylovga tayyorgarlik ko‘rishni buyurgani haqidagi xabarni inkor etdi.

Avvalroq The Economist nashri o‘tgan hafta Ukraina prezidenti Vladimir Zelenskiy yig‘ilish o‘tkazib, o‘z jamoasiga to‘liq o‘t ochishni to‘xtatishga erishilgandan so‘ng saylovlarni tashkil etishni topshirganini xabar qilgan edi.

AQSh tomonining bahosiga ko‘ra, bu holat aprel oyining oxirida yuz berishi mumkin. Nashrning ta’kidlashicha, Ukrainada harbiy holatni bekor qilish saylov jarayonini boshlash uchun zarur bo‘lgan birinchi bosqich hisoblanadi. Qonunga ko‘ra, saylovoldi tashviqoti kamida 60 kun davom etishi lozim, shuning uchun eng erta saylov o‘tkazish imkoniyati iyul oyi boshiga to‘g‘ri keladi.

"Men nafaqat bunday yig‘ilishda qatnashmaganimni, balki umuman bunday yig‘ilish bo‘lmaganini ham tasdiqlayman. Hech qanday saylovga tayyorlanmayapmiz. Oliy Radadagi barcha partiya va fraksiyalar saylovlar harbiy holat bekor qilinganidan olti oy o‘tib o‘tkazilishi kerakligi bo‘yicha kelishib olgan. Bu boradagi pozitsiyamiz o‘zgarmagan", — deya izoh berdi “Xalq xizmatchisi” fraksiyasi rahbari David Araxamiya “Suspilne” nashriga.