Zelenskiy yevropaliklarga murojaat qildi: Xudo saqlasin, rossiyalik jinoyatchilar farzandlaringizga yetib kelmasin

Ukraina urushni iloji boricha tezroq yakunlashga intilmoqda, biroq xavfsizlik kafolatlangani va tinchlik uzoq muddatli hamda adolatli bo‘lishi muhim.

Bu haqda Prezident Vladimir Zelenskiy 31 mart kuni bir qator mamlakatlar parlamenti raislarining ishtirokida o‘tkazilgan Bucha sammitida ma’lum qildi.

Davlat rahbari "munosib" tinchlik nimani anglatishini izohlab berdi.

"Bu shuni anglatadiki, Rossiya ushbu urushdan hech qanday manfaat yoki mukofot olmasligi va qilmishlari uchun adolatli javobgarlikdan qochib qutulmasligi kerak. Yovuzlikni oddiy holga aylantirish, ya’ni hozir barchamiz ko‘rib turgan Rossiyaga nisbatan munosabatni avvalgi holatiga qaytarish mumkin emas," deya ta’kidladi u.

Ukraina prezidenti harbiy harakatlar bilan bog‘liq 100 183 ta jinoyat qayd etilganini ma’lum qildi. Shu bilan birga, u vaqtincha bosib olingan hududlarning katta qismiga Ukraina hozircha kira olmasligini ta’kidladi.

"U yerda yana minglab, balki o‘n minglab, ehtimol yuz minglab jinoyatchilar bor. Va shubhasiz o‘n minglab qurbonlar mavjud," deya qo‘shimcha qildi Zelenskiy.

Uning so‘zlariga ko‘ra, asirlar va tinch aholini qatl etish, zo‘rlash va qiynoqlarga solish kabi minglab vahshiyona jinoyatlar sodir etilgan.

"Evropada hech kim o‘z farzandlarining, Xudo saqlasin, bunday jinoyatchilardan biri bilan yonma-yon bo‘lishini istamaydi," deya ta’kidladi prezident.

Shuningdek, u urush va vahshiylikning yanada tarqalmasligi uchun Rossiyaga bosim o‘tkazish va unga qarshi sanksiyalar qo‘llash zarurligini aytdi.

"Buni voqelikdan ko‘z yummaydigan, haqiqatdan quloq berkitmaydigan har bir kishi tushunadi," dedi u.

Zelenskiy shuni ta’kidladiki, Bucha faqatgina Ukraina fojiasi emas, balki xalqaro hamjihatlik bu urush uchun haqiqiy javobgarlikni ta’minlamasa, Yevropaning har qanday mamlakatida yuz berishi mumkin bo‘lgan hodisalarning bir misolidir.