Venesuela hukumati AQShni og‘oxlantirmoqda: «Bizning qirg‘oqlarimizdan uzoqroq turing»

Venesuela vise-prezidenti va neft vaziri Delsi Rodriges AQShga qarshi keskin bayonot bilan chiqib, Vashingtonni mamlakat ichki ishlariga aralashmaslikka va Venesuela hududidan uzoqroq turishga chaqirdi.

Karabobo shtatida so‘zlagan Rodriges Amerika harbiy kemalarining Karib dengizi tomon yo‘naltirilishiga ishora qilib, AQSh ma’muriyatini dushmanona siyosat yuritayotganlikda aybladi.

— Ichki muammolaringizni hal qiling va bizga yaqinlashmang. Agar AQSh mamlakatimizga hujum qilishga jur’at etsa, Venesuela ular uchun eng dahshatli orzu-umidsizlikka aylanadi, — dedi u.

Rodrigesning ta’kidlashicha, AQSh Venesuelaning boy energiya resurslarini qo‘lga kiritishni maqsad qilgan:
— Ular imperializm va ekspansionizmga asoslangan davlat. Tabiiy boyliklardan foydalanish uchun boshqa mamlakatlarni mustamlaka deb biladilar, o‘zlari esa ijtimoiy va iqtisodiy inqiroz botqog‘ida.

Vise-prezident Vashingtonning Venesuelani «narkoterrorchi davlat» deb atashini rad etdi va buni «uyatsiz yolg‘on» deb baholadi:
— Simon Bolivar va Ugo Chaves xalqi giyohvand moddalar savdosida ayblanishi mumkin emas. Venesuela butun dunyo xalqlari uchun tinchlik va umid mamlakati, — dedi u.

AQSh va Venesuela o‘rtasidagi keskinlik

Ma’lumki, AQSh prezidenti Donald Tramp avgust oyi boshida Lotin Amerikasi narkotik kartellariga qarshi qo‘shin ishlatish orqali kurashish haqida farmon imzolagan edi.

8 avgust kuni Vashington Venesuela prezidenti Nikolas Maduro haqida ma’lumot berganlarga mukofot miqdorini 25 million dollardan 50 millionga oshirdi.

AQSh Moliya vazirligi xabariga ko‘ra, Maduro o‘n yildan ortiq vaqt davomida «Cartel de los Soles» deb atalgan «maxsus belgilangan global terrorchi tuzilma»ni boshqargan.

Oq uy ko‘rsatmasiga binoan Karib dengizi mintaqasiga suv osti kemasi va yettita harbiy kema jo‘natilgan.

Bunga javoban, 18 avgust kuni Maduro Venesuelaning dengizi, osmoni va yerini o‘zi himoya qilishini aytdi:
— Hech qanday imperiya Venesuela va Janubiy Amerikaning muqaddas chegaralarini buzolmaydi, — dedi davlat rahbari.