"O‘zbekkino" MA atrofida bo‘layotgan ommaviy axborot vositalaridagi muhokamalarga O‘zbekiston Kinoarboblari ijodiy uyushmasi moratoriy e’lon qilishni taklif qiladi.
So‘nggi kunlarda bir guruh kinochilarning "O‘zbekkino" MA rahbariga nisbatan Bosh vazirga yo‘llagan shikoyat xati ijtimoiy tarmoqlarda keskin bahs-munozaralarga sabab bo‘ldi va bu jarayon davom etmoqda. Ko‘plab Uyushma a’zolari ijodkorlarning manfaatlarini himoya qilish nuqtayi nazaridan O‘zbekiston Kinoarboblari ijodiy uyushmasiga murojaat qilishdi. Uyushma Boshqaruvi mazkur masala bo‘yicha muhokamada qatnashayotgan jamoatchilikni bosiqlikka chaqiradi. Yurtimizda va butun dunyodagi pandemiya sabab karantin holati bo‘lganligi uchun mavzuga moratoriy (vaqtincha cheklash) e’lon qilishni taklif qiladi. Karantin cheklovi to‘xtatilganidan keyin nafaqat shikoyat xati, balki o‘zbek kinosidagi muammolar yuzasidan Uyushmaning umumiy konferensiyasi chaqiriladi.
O‘zbekiston Kinoarboblari ijodiy uyushmasi yana shuni ma’lum qiladiki, O‘zbekkino MA rahbari faoliyati yuzasidan O‘zbekiston Respublikasi hukumatiga qilingan shikoyat arznomasiga xulosa bildirilguniga qadar hamda Agentlik rahbarining mavjud holat bo‘yicha bayonoti berilgunicha, shuningdek, ayni paytdagi karantin vaziyatini inobatga olgan holda barchadan odob-ahloq me’yorlariga amal qilishni so‘raydi. Uyushma shikoyat xatiga imzo chekkan 109 nafar kinoijodkorning ixtiyorini belgilamaydi va o‘z a’zolari manfaatini doimiy ravishda himoya qiladi. Ayrim kimsalardan "andishaning otini qo‘rqoq qo‘ymasliklarini" so‘rardik.
O‘zbekiston Kinoarboblari ijodiy uyushmasi
