Nobel qo‘mitasi “ko‘plab murojaatlar munosabati bilan” Tinchlik bo‘yicha Nobel mukofoti laureati maqomi o‘zgarmas ekanligi haqida press-reliz e’lon qildi.

“Faktlar aniq va barchaga yaxshi ma’lum. Nobel mukofoti berilgani e’lon qilingandan so‘ng, u qaytarib olinmaydi, bo‘linmaydi va boshqa shaxslarga topshirilmaydi. Qaror yakuniy bo‘lib, doimiy kuchga ega”, – deyiladi qo‘mita bayonotida.

Avvalroq Venesuela muxolifati yetakchilaridan biri Mariya Korina Machado, 2025 yilda olgan Tinchlik bo‘yicha Nobel mukofotini AQSh prezidenti Donald Trampga topshirishga tayyor ekanini bildirgandi.

3 yanvar kuni AQSh maxsus kuchlari Venesuela prezidenti Nikolas Maduroni o‘g‘irlab ketganidan so‘ng, Machado “venesuelaliklar uchun ozodlik vaqti keldi”, – deb bayonot bergandi. Biroq Donald Tramp Venesuelani AQSh vitse-prezidenti Delsi Rodriges bilan hamkorlikda boshqarishni rejalashtirayotganini aytdi. Rodriges Maduroning uzoq yillik safdoshi hisoblanadi.

Trampning so‘zlariga ko‘ra, Machado mamlakat ichida yetarli qo‘llab-quvvatlovga ega emas. The Washington Post manbalarining xabar berishicha, AQSh prezidenti Machadoni qo‘llab-quvvatlashdan u Nobel mukofotini Trampga berishga rozi bo‘lmagani sababli voz kechgan. Chunki Donald Tramp ushbu mukofotni olishni judayam xohlagan.